Батыс Қазақстанда жылыжай құрылысы салынуда

ОРАЛ. Қаңтардың 21-і. ҚазАқпарат /Ғайсағали Ералы/ - Батыс Қазақстан облысында «Oral of Sveden» ЖШС қазақстандық-шведтік бірлескен кәсіпорны жобалық құны 9 млн. еуроны құрайтын жылыжай құрылысын жүргізуде, алты гектар аумақты алатын жылыжай жылына 2,5-3 мың тонна көкөніс өсірмек,

деп хабарлайды ҚазАқпарат тілшісі. Облыстық ауыл шаруашылығы басқармасынан түскен мәліметке қарағанда, жер телімі Зеленов ауданы Мичурин ауылдық округінен бөлінген. Қазіргі кезде жылыжайдың жобалық-сметалық құжаттамасы жасалып жатса, наурыз айының аяғына дейін инженерлік коммуникация желісі тартылмақ. Жылыжай кешеніне қажетті құрал-жабдық тапсырысы 80 пайызға орындалған. Жылыжайда жұмыс жасайтын төрт адамды Швецияға үш айлық оқуға жіберу ойластырылып отыр. Құрылыс, құрал-жабдықты қондыру жұмыстары мамырда аяқталмақ. Жылыжайдан 60 метр қашықтықта салынып жатқан газ турбиналы электр стансасы да осы айда салынып бітпек. Сонда жылыжай кешені жылу қуатымен де қамтамасыз етілетін болады.