Батысқазақстандық депутаттар өңір өміріне белсене араласып келеді - М.Құлшар, облыстық мәслихат хатшысы

Бұл туралы облыстық мәслихат хатшысы Мәлік Құлшар мәлім етті.

Оның айтуынша, «Қазақстан - 2050» стратегиясының жеті басымдықтан тұратыны белгілі. Біріншісі басты игілігіміз - мәң­гілік елімізді XXI ғасыр төріне оздыру болса, екіншісі - ел бірлігі. Қоғамымыздағы тыныштық, әр
түрлі ұлт өкілдері арасын­дағы татулық - баға жетпес бай­лы­ғымыз. Оның айқын дәлелін об­лыстық мәслихат құрамынан да аңғаруға болады. Өңірдің әлеуметтік-экономикалық дамуы жолында жұмыла еңбек етіп келе жатқан 29 депутаттың 21-і - қазақ, бесеуі - орыс, екеуі - татар, біреуі - ук­раин. Мәслихатта 6 депутатты бі­ріктіретін «Ынтымақ» депутаттық тобы жұмыс істейді. Оған Қазақстан халқы облыстық ассамблеясы­ның құрамындағы татар этномәде­ни бірлестігінің төрағасы, депу­тат Ришат Хайруллин жетекшілік етеді.

№13 Қаратөбе сайлау округінен сайланған Нұржан Камалов - тындырымды ісімен халық көңілінен шығып жүрген депутаттардың бірі. Ол облыстық атқарушы органдармен бірлесіп, сайлаушылардың тілектерін орындау бағытында көптеген мәселелердің шешілуіне атсалысуда. 2012 жылы Үшағаш ауылында 108 орындық мектеп салынса, Қаратөбе ауданының Үша­­ғаш, Соналы, Қалдығайты ауыл­­дарына газ өткізілді. Биыл Қал­дығайты ауылында 200 орын­дық мәдениет үйінің іргетасы қаланды.

Бөрлі ауданының №4 Ақсай сай­лау округінен сайланған Тілек Шек­тібаевтың іскерлігін еске­русіз қал­дыруға болмас. Ол 2 мыңға жуық адам қызмет жасайтын «Ақ­сай­газсервис» АҚ-ны басқарады. Ақ^­­сай қаласының көкейтесті мә­се­лелерінің шешілуіне белсене атсалысады. 2012 жылы «Ақсай­газсервис» АҚ «Үздік әлеумет­тік жауапкершілікті мекеме» аталы­мы бойынша республикалық «Па­рыз» сыйлығына ие болды.

№10 Гагарин сайлау округінен (Орал қаласы) депутат Вячеслав Чавкин - «Гидромаш - Орион» инвестициялық компаниясы» ЖШС-ның бас директоры. Өз округі бойынша жолдарды жөндеу, көшелерді жарықтандыру, аула­ларды абаттандыру туралы мәсе­лелерді өткір көтереді. Ол басқаратын компания Харьков ұлт­тық аэрокосмостық университетіне 24 түлекке грант беріп, қазір осы оқу орнын бітірген 10 адам ком­панияда еңбек етуде.

Белсенді депутаттың бірі, №14 Жымпиты сайлау округінен сайланған Ғабдрахим Жаңбырбаев Сырым ауданы тұрғындарын ауыз сумен қамтудағы, елді мекендерді газдандыру, шағын және орта бизнесті дамытудағы аумақтық бағ­дарламалардың іске асырылуы­на тікелей атсалысып келеді. 2012 жылы Сырым ауданы орталығы Жымпиты ауылында саз мектебі салынса, биыл Қ.Мырза Әлі атындағы орта мектеп күрделі жөндеуден өткізілді.

Сол сияқты №10 Переметный сайлау округінен сайланған депутат, «Валентина» ШҚ жетекшісі Валентина Каркула. Екі жылда өз округі бойынша Көшім ауылында дәрігерлік амбулатория, Пере­метный ауылындағы балабақша, музыка мектебінің күрделі жөн­делуіне белсене атсалысты.

№7 Жәнібек сайлау округінен депутат Ескендір Елемесов - «Әлем» ШҚ жетекшісі. Ол мемлекеттік бағдарламалардың жүзеге асырылуына белсене қатысуда. Бұл шаруа қожалығы ірі қара мал мен жылқы өсіретін асыл тұқым­ды шаруашылық мәртебесіне ие. ҮИИД бағдарламасы бойынша өз қаражаты есебінен 2012 жылы мың бас ірі қара малына есептелген бордақылау алаңының құрылысын аяқтады. Кезінде депутат ретінде Алматы облысы, Қызылағаш ауылындағы су тасқынынан, өңірдегі Рыб­цех ауылындағы жер сілкінісінен зардап шеккендерге қаржы­лай қомақты көмек көрсеткен аза­­маттардың бірі. Басқа да халық қалаулылары жөнінде осындай мысалдарды көптеп келтіруге бо­лады.

2012 жылы №9 Энергетик (Орал қаласы) сайлау округінен сайланған депутат ретінде айтарым, мұнда да барлық округтегідей шешімін күткен мәселелер баршылық. Олар: жолдардың күрделі жөндеу қажеттілігі, балалар алаңдарын салу, аулаларды және көшелер­ді жарықтандыру, көп қабатты тұрғын үйлердің лифттерін жөндеу және т.б. Округте 3 орта мектеп, 1 колледж орналасқан. Олардың ішінен №8 мектеп-лицей күрделі жөндеуді қажет етеді. 2014 жылы бұрынғы жасалған, алайда мерзімі өтіп кеткен ЖСҚ-на өзгеріс енгізіліп, жөндеуге қаражат көз­дері іздестірілуде.

Алдағы жылы 7 наурызда мәслихаттардың алғашқы сайлауы өткеніне 20 жыл толады. Жыл өткен сайын мәслихаттардың ро­лі күшейіп келеді. Қазақстан Республикасы Президентінің 2013 жылғы 3 желтоқсандағы №704 Жар­лы­ғымен мәслихаттың үлгі регламенті бекітілді. Бұл регламент барлық деңгейдегі мәслихаттар үшін негізгі құжат болып саналады.

Бұрынғы регламентпен салыс­тырғанда, жаңа үлгідегі регламентте көптеген өзгерістер бар. Ол өзгерістер депутаттардың алдына жаңа жауапкершіліктер жүк­теп отыр десек те болады. Қыс­­қаша тоқтала кетер болсам, осы­ған дейін күн тәртібіне ұсы­ны­­латын мәселелер ресми түрде келіп түскен мәселелерден басқа тұрақты комиссиялар ғана ұсынатын болса, енді сессияның күн тәртібіне ұсыныстарды сессия­­ның төрағасына, жергілікті қоғамдастықтың жиналыстары, қоғам­дық ұйымдар ұсынуы мүм­кін. Сондай-ақ сессияға енгізілетін мәселелерді сапалы дайындау үшін мәслихат хатшысы сессияны дайындау жөніндегі іс-шаралар жоспарын әзірлеуді уақты­лы ұйымдастырады, оны тиісті аумақтың әкімімен келісім бойынша сессия төрағасы бекітеді. Сонымен бірге осыған дейін шешім жобалары тұрақты комиссияларда ғана қаралатын болса, енді шешімдердің жобаларымен жұмыс істеу және басқа да мәселелерді дайындау үшін тұрақты комиссия­лар жұмыс топтарын құра алады. Шешімдердің баламалы жобаларын мәслихат және оның органдары негізгі жобамен бірге қарайды.

Енді аумақтарды әлеуметтік-эко­номикалық дамыту бағдарла­ма­ларының, олар­дың орындалуы туралы есептер­дің, аумақты басқару схемаларының жобалары және мәс­ли­хат сессиясының қарауына шығарылатын басқа да мәселелер жөнінде айтар болсақ, олар бойынша шешімдердің тиістілігіне қарай келісу бұрыштамалары қойыл­ған, барлық қажетті материалдары қоса берілген қазақ және орыс тілдеріндегі жобалары мәслихатқа кезекті сессияға дейін үш апта бұ­рын мәслихаттың тұрақты комис­сияларының қарауына енгізіледі.

Тұрақты комиссиялар уақытша жұмыс тобының пікірін ескере отырып, тиісті негіздемелермен және есептермен тиісті аумақ бюд­жетінің жобасы бойынша ұсы­ныстар әзірлейді және оларды ұсыныстарды жинау мен тиісті аумақ бюджетінің жобасы бойын­ша қорытынды әзірлеуді жүзеге асыратын бейінді тұрақты комиссияға жібереді.

Бюджеттік жоспарлау жөніндегі жергілікті уәкілетті орган сессия басталуынан кемінде екі апта бұрын сессия төрағасына, мәслихаттың хатшысына барлық қажетті материалдармен бірге бюджет туралы шешім жобасының түпкілікті нұсқасын ұсынады.

Мәслихат та жылына кемінде бір рет халық алдында мәслихат­тың атқарған жұмысы, оның тұрақты комиссияларының қыз­меті туралы есеп береді.

«Қорыта айтқанда, облыстық мәс­лихат депутаты болып сайлану - тұрғындардың зор сеніміне ие болу ғана емес, сонымен қатар үлкен жауапкершілік. Мұны батысқазақстандық депутаттар да ешқашан естен шығармақ емес», деп түйіндеді сөзін М.Құлшар.