Бензин арзан кезде көлігің болған тиімді – экономист кеңесі

АСТАНА. KAZINFORM – Шетелдік такси қызметін ұсынатын компаниялар табысының 90-95%-ы Қазақстанда қалады. Бұл туралы Jibek Joly арнасының «Бүгін LIVE» бағдарламасына қонақ болған экономист Сапарбай Жұбаев айтты.

Такси қызметін жиі пайдаланатынын тілге тиек еткен маман еліміздегі жолаушы тасымалдау сервисін көрсететін компаниялардың жұмысына бағасын берді.

– Халықаралық Яндекс Такси, inDrive компаниялары шетелдік болғанымен, Қазақстанда заңды түрде тіркелген. Олар – біздің заңды тұлғаларымыз. Сондықтан салық төлейді. Сонымен қатар тапқан пайдасының 50%-ын немесе одан аз мөлшерін техникалық қызметтеріне жұмсайды да, қалғанын девидент ретінде жібереді. Бірақ ол сомма бізге төлейтін қаражаттың көп болса 5-10%-ын ғана құрайды. Мұны кей отандастарымыз түсінбей, ақшамыз шетелге шашылып жатыр деп ойлайды. Жоқ, ақшаның 90-95%-ы Қазақстанда қалады, - дейді Сапарбай Жұбаев. 

Өз кезегінде экономист еліміздегі такси бағасына көңілі толмайтынын жеткізді. 

– Бағаға көңіліміз толмайтын жағдайлар өте көп. Бірақ ол – сұраныс пен ұсыныстың функциясы. Сұраныс көбейген сайын баға да өсе береді. Тұрғындар такси іздеген кезде көлік бос болмаса, баға көтеріледі. Керісінше көліктер бос болып, олар жолаушы іздесе, баға төмендейді. Сондықтан, баға тұрғысынан халықтың көңілінен шығу үшін мұндай компанияларды көбейте беруіміз керек, - дейді ол.

Сапарбай Жұбаев такси қызметін көп қолданатын қазақстандықтарға кеңес айтты. 

– Қазақстанда бензин бағасы өте арзан. Осындай уақытта үнемді көлік алсаң, ақшаңды тиімді жұмсайсың. Астана, Алматы, Шымкент қалаларында көліктің көп болу себебі де осында деп ойлаймын. Еуропалық дамыған мемлекеттерге барсаңыз, көшеде көп көлік көрмейсің. Олар көбіне қоғамдық көліктерді пайдаланады. Себебі, аталған елдерде бензин бағасы өте қымбат. Сондықтан бензин арзан уақытта несиеге алсаңыз да көлігіңіздің болғаны жақсы. Бірақ, мен үлкен мегаполистерде кептелістерді азайту үшін бензин бағасын инфляция деңгейінде көтеріп қойған дұрыс деп есептеймін, - дейді экономист.

Айта кетейік, өткен айда 175 шетелдік такси жүргізушісі ел аумағынан шығарылды.