Бензин саласындағы қарбалас артта қалды - Энергетика министрлігі
АСТАНА. ҚазАқпарат - ҚР Энергетика вице-министрі Әсет Мағауовтың айтуынша, бұған дейін бензин тапшылығы болған. Алайда қазіргі кезде ондай проблема жоқ, деп xабарлайды ҚазАқпарат тілшісі.
«Шыны керек, шілдеден бастап бензин қоры азая бастады. Дегенмен, импорттың арқасында жағдайдың жақсарғанын байқап отырмыз. Мәселен, соңғы бір аптаның ішінде АИ-92 маркалы бензиннің қоры 120-128 мың тоннадан 134 мың тоннаға өсті. Бұл дегеніміз, барлық мұнай базаларында бензиннің қоры 5 пайызға артты», - деді Мағауов бүгінгі брифингте.
Оның айтуынша, Қазақстандағы бензиннің 30 пайызы сырттан тасымалданады. Аталған отынның дені - Ресейдің мұнай өнімдері.
«Маусымда көрші мемлекеттен 42 мың тонна өнім импортталды. Шілде мен тамызда - 60 мың тонна, ал осы айдың он күнінде шамамен 50 мың тонна жеткізілді. Барлығы 100 мыңдай тонна импортталады. Қазіргі кезде ірі жанар-жағармай құю стансалары қажетті бензиннің көлемін рәсімдеп алды. Негізі, бензин саласындағы қарбаласты еңсердік деуге болады», - деп атап көрсетті вице-министр.
Айта кетейік, бұған дейін Үкімет үйінде өткен баспасөз мәслиxатында ҚР Энергетика вице-министрі Мағзұм Мырзағалиев бензин тапшылығына қатысты түсінік берді.
