Бес айда шағын және орта бизнес кәсіпорындары 2 трлн. 270,2 млрд. теңгенің өнімдерін өндірді
Экономикалық даму және сауда министрлігінің мәліметтеріне қарағанда, 2012 жылдың 1маусымындағы жағдай бойынша, еліміздегі тіркелген шағын және орта бизнес субъектілерінің саны 1 млн. 495 мың 976 бірлікті, ал белсенді шағын және орта бизнес субъектілерінің саны - 839 мың 345 бірлікті құрады. Оның ішінде белсенді шағын және орта бизнес субъектілерінің саны 23,6 пайызға ұлғайды. Олардың құрылымында жеке кәсіпкерлер басымдыққа ие болып 589 640 бірлікті немесе жалпы көрсеткіштің 70,3 пайызын құраған. Ал шаруа және фермерлік қожалықтардың саны - 179 885 бірлік немесе 21,4 пайызды, шағын кәсіпкерлікпен айналысатын заңды тұлғалары - 62 207 бірлік немесе 7,4 пайызды, орта кәсіпкерлікпен айналысатын заңды тұлғалар - 7 613 бірлік немесе 0,9 пайызды құраған.
Бұған қоса, шағын және орта бизнес секторында 2,6 млн. астам қазақстандық жұмыспен қамтылып отыр. Бұл еліміздің барлық экономикалық белсенді халқының 30,2 пайызын құрайды.
Айта кету керек, экономика қарқынының өсуіне еліміз бет алып отырған үдемелі индустрияландыру және экономиканы әртараптандыру бағыты, содай-ақ дағдарыстан кейінгі даму базасын қалыптастыру шаралары негіз болып отыр. Осынау іс-шаралардың арқасында 2012 жылдың қаңтар-наурыз айларында жалпы ішкі өнім құрылымында өңдеу өнеркәсібінің үлесі 12,8 пайызға өскен. Ал Статистика агенттігінің алдын-ала мәліметтеріне сүйенсек, ағымдағы жылдың І жартыжылдығында жалпы ішкі өнімнің өсімі 5,6 пайызды құрады. Таратып айтар болсақ, жалпы өңірлік өнім өндірісіндегі ең үлкен үлес - 17,8 пайыз - Алматы қаласына тиесілі. Сондай-ақ жалпы өңірлік өсім Солтүстік Қазақстан (19,1 пайыз), Қостанай (15,7 пайыз) және Ақмола (15,2 пайыз) облыстарында тіркеліп отыр.