Бестеректегі жол апаты: ауруханаға түсіп, хал үстінде жатқан қыз көз жұмды

АСТАНА. KAZINFORM – Абай облысындағы Бестерек ауылында жол апатына түсіп, ауыр халде жатқан қыз көз жұмды. Сонымен жол апаты құрбандарының саны 4 адам болды.

Кішкентай қыз апаттан соң, ауруханада комада жатқан еді.

Айта кетейік, қайғылы оқиға 19 тамыз күні болды. Toyota маркілі көлігі бір топ балаларды қағып кеткен болатын. Оқиға орнында екі бала және ауруханаға келе жатқанда тағы бір бала көз жұмды.

Президенттің тапсырмасымен аман қалған үш адамға көмек көрсету үшін әскери ұшақ ұшып шықты.

Олардың денсаулық жағдайлары тұрақтанған соң екі бала санавиациямен Астанаға жеткізілді.

Зардап шеккен ең үлкен қыз алдымен Үржар аудандық ауруханасына жеткізіліп, артынан ол тікұшақпен Семейге әкелінді.

- Зардап шеккен кішкентай қыздың жағдайы ауыр еді. Дәрігерлер қолдан келгеннің бәрін жасады. Алайда оның жарақаты тым ауыр болды. Ол есіне келместен көз жұмды, - деді өңірдің денсаулық сақтау басқармасының өкілдері.

Зардап шеккен Айерке мен Ерәділ Тұрсынғазы аман қалды. Ұзақ уақыт ем алған соң олар үйлеріне қайтып, сауықтыру курсынан өтіп жатыр.

Жол апаты оқиғасы бойынша тергеу жүріп жатыр.

Оқиға салдарынан бір отбасының үш баласы мерт болды. Тағы бір отбасы екі жастағы баласынан айырылды. Олардың барлығы бір-бірімен туыс болатын және жазғы демалыста Үржар ауданына әжесі пен апасына қонаққа барған.