Биыл Астана мектептері 31 мың баланы 1 сыныпқа қабылдайды

АСТАНА. KAZINFORM — Астана қаласы білім басқармасы басшысының орынбасары Маржангүл Қайырбаева қала әкімдігінің 2025-2026 жылғы оқу жылына дайындық барысы туралы мәлімет берді.

— Биыл Астана мектептеріне 31 мыңнан астам бірінші сынып оқушысы барады деп күтіліп отыр. Қазір соның 30 057-сі есепке алынды. 1 қыркүйекте сабақ бастайтын жалпы оқушылардың саны туралы болжам — 310 мың баладан асады, — деді ол өңірлік коммуникациялар қызметінің онлайн баспасөз мәслихатында.

Айтуынша, биыл техникалық-кәсіптік білім беру бағытында 10 мың орынға мемлекеттік тапсырыс берілген.

— Оның ішінде 3646 орын жұмысшы мамандықтарға, 6354 орын орта буын мен қолданбалы бакалавриатқа арналған, — деді Маржангүл Қайырбаева.

Бұған дейін биылғы оқу жылында 138 мың оқушы жаңартылған мектептерде білім алатыны айтылған болатын.