Биыл «Жасыл ел» жасағына 34 мыңнан аса адамды тарту жоспарланған
АСТАНА. KAZINFORM — Алматы облысында республикалық «Жасыл ел» жастар еңбек жасақтарының XXII маусымының салтанатты ашылуы өтті, деп хабарлайды Мәдениет және ақпарат министрлігінің баспасөз қызметі.
Іс-шараға еліміздің барлық өңірінен келген белсенді жастар, мемлекеттік органдар мен жастар ұйымдарының өкілдері қатысты.
Маусымның ашылуы аясында қатысушылар 100-ден астам көшет отырғызып, қоршаған ортаға жанашырлықпен қарауды насихаттайтын экологиялық акцияға атсалысты.
— Биыл «Жасыл ел» жастар еңбек жасақтарының жұмысына 34 мыңнан астам адамды тарту жоспарланып отыр. Жоба дәстүрлі түрде жастарды еңбекке баулуға, экологиялық бастамаларға белсенді қатысуға және азаматтық жауапкершілікті қалыптастыруға үндейді, — делінген министрлік хабарламасында.
Бұдан бұрын 14 жастан асқан астаналықтар «Жасыл ел» бағдарламасы бойынша жұмыс істей алатынын жазғанбыз.
