Былтыр тіл оқыту орталықтарына 29 мыңдай қазақ ана тілін үйренуге барған
АСТАНА. KAZINFORM – 21 ақпан – Халықаралық Ана тілі күні. Ғылым және жоғары білім министрлігінің Kazinform сауалына жолдаған жауабында елдегі тіл оқыту орталықтарында өзінің ана тілін оқып жүргендердің нақты саны айтылған.
- Елімізде жергілікті атқарушы органдардың жанынан құрылған 114 тілдерді оқыту орталығы жұмыс істейді. Олардың 95-і - негізгі орталықтар болса, 19-ы - филиалдары.
2024 жылдың қорытындысы бойынша тіл үйрету курсынан өткендер саны – 63 857 адам. Оның ішінде мемлекеттік тілді оқу курсынан өткендер – 45 841, орыс тілі курсынан өткендер – 4 700, ағылшын тілі – 13 316 адам.
Жергілікті атқарушы органдарда қазақ тілі курсынан өткендер саны – 45 114 адам, оның ішінде 16 517 этнос өкілдері, - деп жазылған жауапта.
Аймақтар бойынша қазақ тілін үйренгендер:
- Ақтөбе – 1 700
- Абай – 1 400
- Ақмола – 3 172
- Атырау – 605
- БҚО – 705
- СҚО – 2 346
- Қостанай – 6 761
- Ұлытау – 176
- Жамбыл – 4 052
- Павлодар – 2 294
- Қарағанды – 3 577
- Қызылорда – 1 000
- Түркістан – 4 980
- ШҚО – 2 512
- Жетісу – 3 822
- Шымкент – 901
- Алматы облысы – 2 634
- Алматы – 977
- Астана – 1 500
Министрліктің мәліметіне қарағанда тілдерді оқыту орталықтарының бәрі жергілікті бюджеттен қаржыландырылады. Оқу курсына 18 жастан асқан мемлекеттік қызметшілер мен бюджеттік сала қызметкерлері, ұлттық компания өкілдері, үй шаруасындағы адамдар, зейнеткерлер, шетелдік азаматтар, этнос өкілдері тағы да басқа кез-келген өтінім берген азаматтар қатыса алады.
Ал мемлекеттік органдар мен ұлттық компаниялар оқыту курстарын өз есебінен қаржыландырады.
Сондай-ақ, мемлекет түрлі этнос өкілдеріне қазақ және ана тілдерін үйретуге арналған курстар ұйымдастырып отыр.
- 2024 жылы 10 этностың тілі 2 910 академиялық сағат көлемінде оқытылды (дүнген тілі, өзбек тілі, күрд тілі, татар тілі, ұйғыр тілі, украин тілі, поляк тілі, неміс тілі, корей тілі, беларусь тілі), - деп жазады министрліктегілер.
Ресми мәлімет бойынша қаңтар айында ҰБТ тапсырған талапкерлердің 76,81%-ы қазақ тілінде, 23,14%-ы орыс тілінде, 89 адам ағылшын тілінде тестілеуден өткен.
