Биыл мемлекеттік қызметшілердің жалақысына 1,32 трлн теңге бөлінеді
АСТАНА. ҚазАқпарат - 2017 жылы Қазақстанда мемлекеттік қызметшілерге жалақы төлеуге 1,32 трлн теңге бөлінеді, деп хабарлайды energyprom.kz.
2016 жылы мемлекеттік сектор қызметкерлерінің жалақысына ел бюджетінің шығыны 18%-ға артып, 1,30 трлн теңгені құрады. Ағымдағы жылы бұл көрсеткіш 1%-ға ғана өсіп, бөлінген қаржы көлемі 1,32 трлн теңгеге жетеді. Соның ішінде 1,2 трлн теңге жалақыға, 112 млрд теңге өтемақы төлемдеріне, 7 млрд теңге қосымша қаржылай төлемдерге және 242 млн теңге міндетті зейнетақы аударымдарына жұмсалатын болады.
Қазақстанда мемлекеттік қызметте 98,9 мың адам жұмыс істейді. Оның 53 мыңы - орталық органдарда және 46 мыңы - жергілікті атқарушы органдарда еңбек етуде.
