БҚО-да әділет қызметкерлері құқықтық кеңес беруде
ОРАЛ. 10 қазан. ҚазАқпарат - «Нұр Отан» ХДП-ның облыстық филиалы облыстық әділет департаментімен бірлесіп «Әділет кеңес береді» тақырыбында қоғамдық қабылдау өткізді.
Қоғамдық қабылдауға келген 13 азаматты облыстық әділет департаменті бастығының орынбасары Галина Имашева мен аталмыш департаменттің бөлім бастықтары, мамандары, жеке нотариустар мен адвокаттар қабылдады.
- Бірлескен шараның басты мақсаты - халыққа құқықтық көмек көрсету. Заңгерлер, түрлі құзырлы органдардың мамандары қабылдауға келген азаматтарға тегін кеңес береді. Тұрғындар түрлі мәселелермен бізге келіп жатыр. Көбінің көмек сұрап келетін түйткілі - сот шешімдерінің орындалмауы. Сондай-ақ жылжымайтын мүлікті тіркеу, жер дауы, сот шешімімен келіспеушілік, мұрагерлік мәселелерімен келетіндер де көп. Құқықтық білімі жетіспегендіктен алаяқтарға алданған азаматтар да заңгерлерден кеңес сұрап жиі келеді, - дейді «Нұр Отан» ХДП БҚОФ-ның қоғамдық қабылдау бөлмесінің меңгерушісі Гүлжан Мұхтарова.
Елдегі бас партияның облыстық бөлімшесінің билік пен халықтың арасына дәнекер болып ұйымдастырған осындай қабылдауларында үш жылдан бері екі мыңнан аса батысқазақстандыққа көмек көрсетілген.
