БҚО-да киік мүйіздерімен Жамбыл және Алматы облысының тұрғындары ұсталды

ОРАЛ. ҚазАқпарат - Батыс Қазақстан облысында 5-25 қазан аралығында өтіп жатқан «Браконьер» жедел алдын алу шарасы барысында алғашқы 15 күнде 175 табиғат заңдылығын бұзушылық анықталды.

БҚО ІІД баспасөз қызметінен түскен мәліметке қарағанда, соның 10-ы бойынша қылмыстық, 165-і бойынша әкімшілік іс қозғалды. Мысалы, Бөкей ордасы аудандық ішкі істер бөлімі қызметкерлері ҚР АШМ орман шаруашылығы мен жануарлар әлемі комитеті аумақтық инспекциясы және «Охотзоопром» өндірістік бірлестігінің инспекторларымен бірлесе отырып, аудан аумағындағы Елқонды елді мекенінде «ISUZU» автокөлігін тоқтатқан. Көлікті тексеру кезінде 50 дана киік мүйізі табылып, тәркіленді. Аталған дерек бойынша Жамбыл облысының 4 және Алматы облысының бір тұрғыны ұсталды. Осыған орай ҚР ҚК 339-бабы 1-бөлімі бойынша қылмыстық іс қозғалып, тергеу амалдары жүргізілуде.

Сонымен қатар Орал қаласында, Ақжайық, Шыңғырлау, Тасқала, Қаратөбе аудандарында заңсыз ағаш кесу деректері анықталды.