БҚО-да ресейлік өнертапқыштардың қондырғысымен қарызы бар тұтынушылардың су құбырлары жабылуда
Мұның артықшылығы сонда, қондырғы кәріз желісін бүлдірмейді және берешегі жоқ тұрғындарға су еш кедергісіз келіп тұрады. Қарызын өтегеннен кейін су құбыры қайта ашылады. Қондырғының құны - 2 млн. теңге. Бір мекемеге бір қондырғы жеткілікті.
«Батыс су арнасы» ЖШС абоненттік бөлімінің бастығы Нәсіп Мәмбетованың айтуынша, Орал қаласында тұтынушылардың жыл басынан бергі қарызы 60 млн. теңгеге жеткен. Бұған биыл ақпан айында суға және кәріз қызметіне бағаның көтерілуі себепші болды. Берешегі көп тұтынушыларға алдымен бірнеше мәрте ескерту жасалады, оған құлақ аспаса, құбыры жабылады. Осы апта ішінде қалада қарызы 70 мың теңгеден асқан үш пәтердің кәрізіне тоқтау салынды.
Бұған дейін қарыз төлемеушілермен күрес сотқа шағымданумен бітетін. Күні бүгін 22 млн. теңгені өндіру үшін 1250 атқарушылық құжат толтырылған.