БҚО-да ресейлік зейнеткерді өлтірген қылмыскер 7 жылға сотталды
ОРАЛ. 22 қаңтар. ҚазАқпарат - Бөрлі аудандық соты өз үйінде ресейлік зейнеткерді ұрып-соғып өлтірген қылмыскерді 7 жылға бас бостандығынан айырды.
Облыстық соттың баспасөз қызметінен Гүлмира Кенжеғалиеваның хабарлағанындай, Ақсай қаласының 32 жасар тұрғыны бұдан бұрын үш рет сотталған, тіпті бастапқыда кәмелетке толмай жатып-ақ қылмыстық жауапкершілікке тартылған. Содан кейін ұрлығы мен бұзақылығы үшін сазайын тартты.
Ол өзі үйіне алып келген 71 жасар ер адамды ұзақ уақыт бойы соққыға жыққан. Сосын қартты сыртқа шығарып жіберіп, өзі теледидар қарап отыра берген. Зейнеткер үйден ұзамай жатып жығылғаннан тұрмаған. Сараптама көрсеткеніндей, ажал бастан тиген ауыр соққыдан болған.
Қылмыскер енді жазасын қатаң режимдегі колонияда өтеп, маскүнемдіктен емделетін болады.
