БҚО-да сыбайлас жемқорлық қылмысы артып отыр

Бұл туралы ҚР Бас про­кура­ту­расы Құқықтық ста­тистика және ар­найы есепке алу жөніндегі ко­митеті­нің облыстық бас­­­қар­масы сыбайлас жемқор­­лыққа бай­ланыс­ты қылмыстар мен құ­­қық бұзушы­лықтарды рет­тей­­тін мемлекеттік құрылым­дардың нормативтік-құ­қық­­тық актілерін сақтау мәселелері жөнінде өткізген семинарда айтылды.

Аталмыш басқарманың ар­найы есепке алу бө­лімі басты­ғы Ақмарал Шәпекованың баян­дама­сында көр­сетілгеніндей, жем­қорлыққа бай­ланысты құқық бұзушылық жа­са­ған­дар тізіміне 2010 жылы 317 адам тір­келсе, 2011 жылы 210 кісі жа­уап­кер­шілікке тартылған.

БҚО ІІД өзіндік қауіпсіздік бас­қар­ма­сының қызметкері Артур Мұсағалиев өткен жыл ішінде сыбайлас жемқорлық заңбұзушы­лығына байланыс­ты ішкі іс­тер органдарының 60 қызметкері жа­уапқа тартылғанын айтты. Соның 24-і органнан қуылған. Облыстық қаржы полициясы талдау тобының инспекторы Қуаныш Берімбетов 2011 жылы сыбайлас жемқорлыққа қатысты 67 қыл­мыс әшкереленгенін мәлімдеді. Бұл 2010 жылмен салыстырғанда 17,9%-ға көп. Жаңағы 67 қылмыстың 22-сін (32,8%) түрлі деңгейдегі әкімдік қыз­мет­керлері жасапты. Әлеу­меттік сала қызметкерлеріне - 11 жемқорлық қыл­мысы, денсаулық сақтау саласы қыз­меткерлеріне - 4, білім беру саласы қызметкерлеріне 10 қылмыс тиесілі. Құқық қорғау органдары мен сот жүйесінің қыз­меткерлері 11 мәрте жемқорлық сипаттағы қылмыс жасаған. Спорт пен туризм саласы мамандарының еншісін­де  4 қылмыс бар.

Семинарда сыбайлас жемқорлыққа қатысты заңбұзушылық жаса­ған қызмет­керлердің арнайы есеп­ке алынып, үш жыл бойы «қара тізімде» тұратыны да айтылды. Атал­ған тұлғалар қызмет ба­бымен жоғарылай алмайды. Кейбір ме­ке­ме басшылары, аудан әкімдері «Сы­байлас жемқорлыққа қарсы күрес жө­ніндегі» заң талаптарын біле бер­мейді. Мысалы, лауазымынан бо­са­тылуы тиіс қызметкерге сөгіс жариялап, орнында қалдырады.

Басқосуда ҚР «Сыбайлас жемқор­лыққа қарсы күрес жөніндегі» заңының кейбір осал тұстарын жетілдіру мәселе­­сі де сөз бол­ды. БҚО-дағы тәртіптік ке­ңес хатшылы­­ғының меңгерушісі Мирбо­лат Нұртазин, облыстық соттың судьясы Біржан Мәмбетов, облыстық проку­ра­ту­ра қызметкері Арон Ақпанов семинарда талқыланған жәйттерге қатысты өз ойларын ортаға салды.