БҚО-да заңсыз киік аулағандар ұсталды
ОРАЛ. ҚазАқпарат - Қазталов аудандық ішкі істер бөлімінің қызметкерлері «Охотзоопром» өндірістік бірлестігі инспекторларымен бірлесе отырып, 17 қыркүйек күні кешкісін жедел іздестіру шаралары барысында Қараоба ауылында заңсыз киік аулаған 1977 жылғы екі тұрғынды ұстады.
БҚО ішкі істер департаментінің баспасөз қызметінен түскен мәліметке қарағанда, олардың біреуі ішкі істер органында есепте тұрады, екеуі де - осы ауданның тұрғындары. Тексеру кезінде «ВАЗ-2109» автокөлігінің ішінен 16 калибрлі қос ұңғылы «ТОЗ» аңшы мылтығы, 4 оқ-дәрі және атып алынған киіктің төшкесі табылып, тәркіленді.
Аталған азаматтарға қатысты ҚР ҚК 337-бабы 1-бөлімі бойынша (заңсыз аңшылық) қылмыстық іс қозғалып, сотқа дейінгі тергеу амалдары жүргізілуде.
Айта кетейік, киік Батыс Қазақстан облысында негізінен Қазталов және Жәнібек аудандарын мекендейді.
