БҚО мен Ақмола облысының тұрғыны Атырауда есірткіні тығып сатпақ болған
АТЫРАУ. KAZINFORM — Атырауда есірткіні тығып сатпақ болған Батыс Қазақстан және Ақмола облысының тұрғыны ұсталды. Қазір олар уақытша ұстау изоляторына қамауға алынды.
Атырау облыстық полиция департаментінің баспасөз қызметінен мәлім еткендей, өзге өңірдің тұрғындары есірткі заттарын заңсыз сақтау, тығып сату күдігіне ілінген.
«Есірткі қылмысына қарсы іс-қимыл басқармасының қызметкерлері облыс аумағында есірткі заттарын сақтаған деген күдікпен Батыс Қазақстан облысының тұрғынын анықтады. Оның жалдамалы пәтеріне тінту жүргізу кезінде қара сөмкеге салынған 1 келіге жуық есірткі тәркіленді. Сот сараптамасының қорытындысына сәйкес тәркіленген құрғақ өсімдік гашиш есірткісі екені анықталды. Күдікті құмар ойындармен әуестенген. Соның салдарынан қарызы 8 млн теңгеге жуықтаған. Қарызынан құтылу үшін еліміздің оңтүстік өңірінен есірткі заттарын тасымалдап, сатпақ болған», - деп хабарлады департаменттің баспасөз қызметі.
Ал, екінші күдікті — Ақмола облысының тұрғыны. Ол Атырауға биыл қаңтарда келген.
«Күдіктінің Атыраудағы уақытша тұрақтаған мекен-жайын тексеру кезінде жалпы салмағы 175 грамм болатын синтетикалық есірткі тәркіленді. Ол синтетикалық есірткіні жасырын тығу әдісімен сату үшін интернет-дүкендердің жарнамасына сеніп келгені анықталды», - деп мәлім етті департаменттің баспасөз қызметінен.
Қазір 2 күдікті уақытша ұстау изоляторына қамауға алынды. Күдіктілерге қатысты сотқа дейінгі тергеу жүргізу басталды.
Еске сала кетелік, бұған дейін Атырауда көрші өңір тұрғындарынан есірткі мен тапанша тәркіленгенін хабарлаған едік.
