Бір ғимаратта 3 театр - Президент бизнес өкілдерін аймақтық театрларды қолдауға шақырды

БУРАБАЙ. KAZINFORM – Мемлекет басшысы Қасым-Жомарт Тоқаев Бурабайда өтіп жатқан Ұлттық құрылтайдың IV отырысында аймақтық театрлардың жай-күйі туралы мәселе көтерді және жергілікті бизнес өкілдерін театрларға қолдау көрсетуге шақырды.

Өз сөзінде Президент тәуелсіздік жылдары мәдениет саласында көп жұмыс атқарылғанын, классикалық және заманауи музыкаға арналған сәулетті ғимараттар салынып, көптеген театр ашылғанын ерекше атап өтті.

− Қазақстанда театр өнеріне қызығушылық артып келеді. Зал көрерменге толы, қойылымдардың премьерасына билеттер екі-үш апта бұрын сатылып кетеді. Сахна өнеріне құштар жандардың арасында жастардың көп болуы көңілге ерекше қуаныш ұялатады, − деді Қасым-Жомарт Тоқаев.

Қазір Қазақстанда 46 аймақтық театр бар. Алайда оның көпшілігінің жай-күйі мәз емес. Мысалы, Семейде бір ғимаратта 3 бірдей театр сығылысып отыр.

− Әсіресе, аймақтарда театрларды дамытуға баса назар аудару керек. Халқымыздың мәдени әралуандығын сақтауға мүмкіндік беретін орыс және басқа да ұлттық театрларды қолдау маңызды. Елімізде өнердің бұл түрі де табыс әкелетінін дәлелдеп жүрген жеке театрлар аз емес. Сондықтан бизнес өкілдерін аймақтағы театрларға белсене қолдау көрсетуге шақырамын, − деді Мемлекет басшысы.

Айта кетейік, Президент мемлекеттік әлеуметтік тапсырыс туралы жаңа заң әзірлеуді тапсырды.