Бу қазандығындағы жарылыс: Адам өліміне қатысты қылмыстық іс қозғалды
КӨКШЕТАУ. ҚазАқпарат - Ақмола облысында адам өліміне алып келген бу қазандығының жарылуына байланысты қылмыстық іс қозғалды, деп хабарлайды ҚазАқпарат тілшісі аумақтық ІІД баспасөз қызметіне сілтеме жасап.
«Зеренді ауданы Приречное ауылының 50 жастағы тұрғынының бу қазандығы жарылуы салдарынан опат болуына байланысты ҚР ҚК 156 бабының 3 бөлігі (еңбекті қорғау ережесінің бұзылуы) бойынша іс қозғалып, сотқа дейінгі тергеу амалдары жүргізілуде», - делінген Ақмола облысы бойынша ІІД баспасөз қызметінің хабарламасында.
Ведомствоның дерегі бойынша тергеу амалдары шеңберінде бірқатар сараптамалар тағайындалды.
Еске сала кетейік, қарашаның 23-і күні сағат 16:20-да Зеренді ауданының Приречное ауылындағы ЖШС-нің біріне тиесілі ғимараттың бу қазандығы жарылды. Салдарынан 50 жастағы жергілікті тұрғын көз жұмды. Тағы екі адам түрлі дене жарақатымен Ақмола облыстық ауруханасына жатқызылды.
