Бүгін - Дүниежүзілік қалқанша безі күні

АСТАНА. 25 мамыр. ҚазАқпарат - Дата күнтізбеге Еуропалық тироидтық (European Thyroid Association - қалқанша безімен және оның ауруларымен байланысты мәселелерді зерттеумен айналысатын ұйым) қауымдастық 25 мамырды Дүниежүзілік қалқанша безі күні ретінде атап өтуді ұсынған 2009 жылдан бастап енді.

Бұл бастаманы Азияда, Солтүстік және Латын Америкасында жұмыс істейтін осы бағыттағы өзге дәрігерлік қауымдастықтар қолдады.

Медициналық статистикаға сәйкес, қалқанша безінің жұмысындағы әртүрлі ақауларға ғаламшар тұрғындарының үштен бір бөлігіне жуығы шалдыққан. Безде түйіндердің пайда болуы ересек адамдардың 30 пайызында, зоб (йодтың жетіспеушілігінен бездің ұлғаюы) 10-30 пайызында анықталады.

Бұл маңызды ағзаның (қалқанша без зат айналымын және клеткалардың өсімін реттейтін гормондарды шығарады) сырқатынан бүгінгі күні сауығып кетуге болады. Ал йод тапшылығымен байланысты сырқаттарға қатысты айтатын болсақ, ас тұзын жалпылама йодтау бағдарламасы арқылы оның алдын алуға болады. Бұл бағдарлама бүгінде көптеген мемлекеттерде жүзеге асырылуда.