Бүгін Қазақстанның кейбір аймақтарында бұрқасындатып, жел тұрады - Қазгидромет
АСТАНА. 17 ақпан. ҚазАқпарат - «Қазгидрометтің» болжауынша бүгін, 17 ақпан күні Қазақстанның басым аумағының ауа-райын атмосфералық ағымдармен байланысты циклон қалыптастырады.
Республиканың батысы антицклон тарамдарының ықпалында болады.
Мәселен Алматы облысында 15-20 м/с күшпен жел соғады, Жалаңашкөл аумағында оның екпіні 20-25 м/с-қа дейін жетуі ықтимал. Түнде жекелеген аумақтарға тұман түседі.
Ақмола, Солтүстік Қазақстан, Шығыс Қазақстан, түнде Ақтөбе облыстарында кей жерлерде - бұрқасын, 15-23 м/с екпінде жел тұрады.
Жамбыл және Оңтүстік Қазақстан облыстарының кей аумақтарында тұман, көктайғақ, секундына 15-22 метр жылдамдықта жел соғады, Жамбыл облысында оның күші 25-ке жетуі ықтимал.
Қызылорда облысында кей өңірлерде - көктайғақ, 15-20 м/с жылдамдықта жел соғады.
Маңғыстау облысында көктайғақ күтілуде.
Қостанай облысының жекелеген аумақтарында бұрқасындатып, күндіз 23 м/с-қа дейінгі күшті жел тұрады.
Павлодар облысында- бұрқасын, түнде жекелеген жерлерде, күндіз облыстың басым аумағында 17-22 м/с жылдамдықта жел тұрады, кей уақытта оның екпіні 25 м/с-қа жетпек.
Қарағанды облысында сондай-ақ бұрқасындатып, 15-20 м/с-та жел соғады, түнде - тұман, көктайғақ болжануда.
