Бүгіннен бастап Астанада дүниеге келген әр сәбидің атынан бір атаулы көшеттен отырғызылатын болады

АСТАНА. Ақпанның 13-і. ҚазАқпарат /Гүлмира Әлиакпарова/ - Бүгін Астана қаласы әкімінің орынбасары Әмірхан Рақымжанов «Әр сәбиге – бір көшеттен» акциясын бастап, №1 перзентханада дүниеге келген нәрестелердің ата-аналарына атаулы көшеттердің орналасу сызбасы көрсетілген алғашқы буклеттерді табыс етті,

деп хабарлайды ҚазАқпарат. «Құрылысы қарқынды жүріп жатқан Астананы көгалдандыру да ерекше маңызды болғандықтан, қала әкімі Иманғали Тасмағамбетов «Әр сәбиге ? бір көшеттен» акциясын өткізуді ұйғарды. Бүгіннен бастап қалада дүниеге келген әрбір нәрестеге бір көшеттен аталатын болады. Ондағы мақсат - әрбір перзентке елорданың тарихына өзіндік із-таңбасын қалдырту», - деді Ә.Рақымжанов. Атаулы көшеттер белгіленген сызба бойынша саябақтар, гүлзарлар мен мәдени демалыс алаңдарына отырғызылмақ. Олардың күтімімен сәбилердің ата-аналарымен қоса, арнайы мекемелер де айналысатын болады. Акцияның өткізілу мерзімі шексіз. Денсаулық сақтау басқармасының мәліметі бойынша, елордада ай сайын 1200-ге жуық, ал күніне 35-40 сәби дүние есігін ашады.