Бүгін-ақ 200 теңгеден жеткізе аламыз – Сапаров елордадағы картоп бағасы жайлы

АСТАНА. KAZINFORM – Біз бүгін-ақ Астанаға 200 теңгеден картоп жеткізе аламыз. Бірақ сауда нүктелеріне қатысты мәселе бар. АШМ басшысы Айдарбек Сапаров осылай деді.

Үкімет отырысынан кейінгі баспасөз мәслихатында БАҚ өкілі бүгінгі күні елордадағы Magnum сауда желісінде картоп бағасы 450 теңге екенін, ал Small-да картоп мүлде жоқ екенін айтты. 

- Шынымен, картоп бағасы 450 теңгеге жетті. Small-ға келетін болсақ, мен бұл жұмысты орынбасарыма тапсырдым. Іргеміздегі Павлодар, Қарағанды облыстары бағаны түсіру жұмыстарын жүргізіп жатыр. Бірақ фермерлер катопты сатқысы келмей отыр. Бізде картоп жеткілікті. Біз бүгін-ақ 5-10 камаз әкеліп, 200 теңгеден өткізіп бере аламыз, қабылдай алса болды. Оған 20 пайыз қосса, құны 240 теңге болады. Бұл жерде сауда нүктелеріне қатысты мәселе бар. Бұл мәселені қарастыратын боламыз, - деді министр.

Айта кетейік, бұған дейін ведомство өкілі «Сапалы картоп сыртқа сатылып, сөреде Қытайдың сапасыз өнімі қалғаны рас па?» деген сұраққа жауап берген еді. Сондай-ақ ел аумағынан үшінші елдерге картоп шығаруға тыйым салынған еді.