Бұқтырмаға салынып жатқан көпір ақылы болуы мүмкін

ӨСКЕМЕН. KAZINFORM – Шығыс Қазақстан облысындағы Бұқтырма су қоймасына салынып жатқан көпір ақылы болуы мүмкін.

ШҚО Жолаушылар көлігі және автомобиль жолдары басқармасының мәліметіне сүйенсек, Күршім мен Самар аудандарын жалғайтын Бұқтырма су қоймасындағы «Қызыл ту» өткеліне салынып жатқан көпір осы жылдың қазан айының соңында ашылады деп жоспарланып отыр.

Қазіргі уақытта тіректерді салу және аралықтарды орнату жұмыстары толығымен аяқталып, кірме жолдарға асфальт төселуде.

«Көпірмен жүру ақылы болуы мүмкін. Бүгінде бұл мәселе талқыланып жатыр. Нақты шешім әлі қабылданған жоқ», - деп хабарлады ведомство өкілдері.

Түпкілікті шешім тапсырыс беруші - Автомобиль жолдары комитеті көпірді жергілікті атқарушы органға бергеннен кейін қабылданбақ.

Еске салсақ, Бұқтырмадағы екі жолақты автокөлік көпірі Қазақстандағы су үстіне салынған ең ұзын құрылым болатындығы хабарланған.