Бұрынғы павлодардық шенеуніктерге 328 млн. теңге көлемінде шығынды өтеу белгіленді
ПАВЛОДАР. 2 маусым. ҚазАқпарат - Павлодар қалалық сотына облыстық қазынашылық департаментінен 4 азаматшаға қатысты қылмыстың нәтижесінде келтірілген 328 млн. теңге көлемінде зиянды өтеу туралы талап арыз келіп түсті, деп хабарлады мекеменің баспасөз қызметі.
Осы жылдың 28 наурызында заңды күшіне енген, Павлодар қаласының №2 сотының үкімімен, Павлодар облысы бойынша Қазынашылық Департаментінің қаржылай қамсыздандырудың бұрынғы басшысы мен басшының орынбасары және бөлімнің 2 қызметкері мемлекеттiк қызметтер атқаруға уәкiлеттi адам не оған теңестiрiлген адамдардың, өзiнiң қызмет бабын пайдалану арқылы алдын-ала ұйымдасқан топпен iрi мөлшерде мүлікті иелену, яғни айыпталушыға сеніп тапсырылған бөтеннің мүлкін иелену т.т. бойынша кінәлі деп танылды.
Департаменттің бұрынғы басшысы 7 жылға, екі қызметкер мүліктері тәркіленуімен 9 жылға сотталды. Тағы бір айыпталушыға қатысты судья бес жыл мерзімге шартты жаза тағайындауды жөн деп есептеді.
Тергеу барысында 2001-2010 жылдар аралығында шенеуніктер қаражаттан 300 миллион теңгеден астам ақшаны жымқырғаны анықталды.
Талапкер айыпталған жауапкерлерден келтірілген мүліктік зиянды өндіруді талап етіп отыр.
