БҰҰ басшысы әлемдік экономика үшін сауда соғысының қауіпті екенін ескертті

АСТАНА. KAZINFORM — БҰҰ Бас хатшысы Антониу Гутерриш сауда соғыстарында жеңімпаздар жоқ екенін ескертті, деп хабарлайды Синьхуа.

Бұл туралы жұма күні оның ресми өкілі Стефан Дюжаррик мәлімдеді.

Сәрсенбіде АҚШ президенті Дональд Трамп «баламалы тарифтер» деп аталатын жарлыққа қол қойып, 10 пайыздық базалық тариф және бірқатар сауда серіктесі үшін жоғары баж салығын енгізді.

Гутерриштің Ақ үйдің жаңа тарифтік саясатына қатысты пікірі туралы сауалға жауап берген Дюжаррик «сауда соғысында жеңімпаздар жоқ» екенін айтты. Сондай-ақ, ол қазіргі ахуалды еңсеру қиынға соғып отырған ең осал елдер үшін аталған жағдай ең үлкен проблемаларды туындататынын атап өтті.

Ол жаһандық сауда соғысы БҰҰ-ның Тұрақты даму мақсаттарына қол жеткізуіне теріс әсер етуі мүмкін екенін алға тартты.

Жұма күні жарияланған ЮНКТАД (United Nations Conference on Trade and Development — ред.) мәлімдемесінде АҚШ тарифтері осал елдерге қатты әсер етуі мүмкін делінген. Ұйым әлемдік сауда жүйесі инвестицияларға және дамудағы прогреске қауіп төндіретін қиын кезеңге еніп жатқанын ескертті. 

Еске салсақ, жоғары баж салығына ілінген Қытайдың Сауда министрлігі бұл шешімге қатаң қарсылық білдіріп, өз мүддесін қорғау үшін қажетті қарымта шаралар қабылдайтынын мәлімдеді.

Сонымен қатар, Трамптың тарифтерінен кейін әлемдегі ең бай адамдар 24 сағатта 208 млрд доллардан айырылғаны анықталды.