БҰҰ: Нигерияда 600 мыңнан астам бала аштықтан өліп кетуі мүмкін
АСТАНА. KAZINFORM — Нигерияның солтүстік-шығысындағы террористер белсенді әрекет етіп жүрген Борно, Адамава және Йобе штаттарында гуманитарлық дағдарыс үдей түсті, деп хабарлайды Анадолы.
Біріккен Ұлттар Ұйымы Нигерияның солтүстік-шығысындағы террористер белсенді әрекет ететін штаттарда 600 мыңнан астам баланың аштық қаупіне ұшырағанын және алдағы 6 айда азық-түлікке шұғыл қол жеткізе алмаса, олардың өліп кетуі мүмкін екенін хабарлады.
Нигерия үкіметі мен БҰҰ өкілдерінің бірлескен мәлімдемесінде солтүстік-шығыстағы Борно, Адамава және Йобе (BAY) штаттарында террористердің әрекеттеріне байланысты гуманитарлық дағдарыстың ушығып кеткені айтылған.
Осы ақпаратқа сәйкес, маусым айында басталатын құрғақ маусымда Борно, Адамава және Йобе штаттарында 4,6 миллион адам азық-түліктің жедел тапшылығын бастан кешеді, өз кезегінде бұл алтыншы жыл қатарынан аймақтағы ауыр гуманитарлық жағдайды туындатады.
Сонымен қатар, Нигерияның гуманитарлық мәселелер және кедейлікпен күрес министрі Нентаве Гошве Йилватда мен БҰҰ-ның Нигериядағы гуманитарлық мәселелер және резиденттер істері жөніндегі үйлестірушісі Мохамед Фолл Абуджа астанасында өткен шарада «Нигерияға арналған 2025 жылғы құрғақ маусымға қарсы әрекет жоспарын» таныстырды.
Шарада сөйлеген сөзінде министр Йилватда алдағы уақытта Борно, Адамава немесе Йобе штаттарында ешбір баланың аш жатпайтынына уәде етті.
— Бұл жоспар тек құрылымдар мен стратегиялар туралы емес. Бұл Борно, Адамава немесе Йобе штаттарында ешбір баланың аш жатпауы, ешбір ананың емделетін аурудан баласын жоғалтпауы және қақтығыс пен кедейліктің салдарынан адамдық қадір-қасиет зардап шекпеуі туралы уәде, — деді ол.
БҰҰ үйлестірушісі Фолл бұл мәселеге байланысты пікір білдіріп, халықаралық ұйымдарды қолдау көрсетуге шақырды.
— Гуманитарлық көмекке қауіп төніп тұр. Ынтымақтастық әлсіреп барады, ал ресурстардың жетіспеушілігі миллиондаған адамдарды, әсіресе балаларды, қауіпке ұшыратып жатыр, — деп атап өтті Фолл.
Осыған дейін Нигерия азық-түлік қауіпсіздігіне төнген қатерге байланысты төтенше жағдай жарияланғаны белгілі болды.
