БҰҰ Рим саммитінің декларациясын сынға алды
АСТАНА. Қарашаның 17-сі. ҚазАқпарат - Біріккен Ұлттар Ұйымының Азық-түлік ұйымының басшысы Жак Диуф ашаршылықпен күрес мәселелері бойынша Римде өтіп жатқан саммиттің қорытынды декларациясын сынға алды,
деп хабарлайды «Азаттық» радиосы.
Диуфтың айтуынша, ашаршылықты түп-тамырымен жою жөніндегі жедел іс-қимылдарға үндейтін құжатта нақты ұсыныс жоқ және проблемаларды шешудің нақты мерзімдері аталмаған.
Ақпарат агенттіктері сондай-ақ дамушы елдердің ауыл шаруашылықтарын қолдауға жыл сайын 40 миллиардтан астам доллар бөліп тұру туралы БҰҰ-ның үндеуін халықаралық саммитке қатысушылардың қабылдамағанын атап көрсетуде.
БҰҰ-ның бағалауынша, әлемде аш-жалаңаштардың саны 1 миллиардтан асады.
