Чилиде тағы да жер сілкінді
АСТАНА. Наурыздың 16-сы. ҚазАқпарат - Дүйсенбі күні Чилиде күші 6,7 балдық кезекті қатты жер сілкінісі болды.
АҚШ-тың Геологиялық қызметінің мәліметтері бойынша, зілзала кіндігі Чили елордасының оңтүстігіне қарай шамамен 350 шақырымдай қашықтықта тіркелген. Соған қарамастан, жерасты дүмпулері Сантьягода сезілген. Жер сілкінісінің ошағы 34 шақырымдай тереңдікте болған. Құрбан болғандар мен мен қираулар туралы әзірге ешқандай дерек жоқ, деп хабарлайды Associated Press агенттігі.
Естеріңізге сала кетейік, Чилиде ақпан айының аяғында болған күші 8,9 балдық жер сілкінісінің салдарынан, түрлі мәліметтер бойынша, 500 бен 800-дің аралығында адам өмірі қиылған. Әлі де жүздеген адам із-түзссіз жоғалғандар санатында.
Зілзаладан келген шығынды ел үкіметі 30 миллиард долларға бағалап отыр, бұл елдің жалпы ішкі өнімінің 10-15 пайызына тең. Одан кейін де елде бірқатар жерасты дүмпулері тіркелгенін айта кету керек. Атап айтқанда, наурыздың 11-інде жаңа жер сілкінісінен Ранкагуа қаласы қатты зардап шекті.
