Д.Ақышев: Ұлттық банк үшін негізгі басым міндет - инфляцияны ортамерзімді аралықта 4 пайызға дейін төмендету
АСТАНА. ҚазАқпарат - Ұлттық банк үшін негізгі басым міндет - инфляцияны ортамерзімді аралықта 4 пайызға дейін төмендету. Бұл туралы бүгін Үкімет отырысында ҚР Ұлттық банкі төрағасы Данияр Ақышев мәлім етті.
Ол өз сөзінде Елбасының Жолдауда берген тапсырмаларын орындау бойынша Ұлттық банктің шаралары алдағы жоспары Жалпыұлттық іс-шаралар жоспарында көзделгенін атап өтті.
«Алдын ала болжауға болатын және төмен деңгейдегі инфляция, кредиттік және инвестициялық белсенділіктің өсуіне ықпал етеді. Еліміздегі ақшаның және қаржының тұратылығын айқындайды. Сол себепті инфляцияны 6-8 пайыз шамасында ұстап тұру және ортамерзімді аралықта 4 пайызға дейін төмендету Ұлттық банк үшін негізгі басым міндет болады», - деді Д.Ақышев.
Оның атап өтуінше, бұл Ұлттық Банктен де, Үкіметтен де экономикалық реформаларды іске асыру, ақша-кредит саясатын жүргізу барысында айтарлықтай күш-жігер жұмсауды талап етеді.
«Түпкілікті мақсатымыз - кредиттік және инвестициялық белсенділіктің өсуі, еліміздегі ақшаның және қаржының тұрақтылығын қамтамасыз ету. Оған алдын ала болжанатын және төмен инфляция деңгейі ықпал ететіндігі белгілі», - деді ол.
