Дәрілердің қауіпсіздігі және сараптамасы туралы ресми ақпараттарды арнайы сайттан білуге болады - ҚР ДСМ
АСТАНА. 6 қыркүйек. ҚазАқпарат - ҚР Денсаулық сақтау министрлігі «Дәрілік заттарды, медициналық мақсаттағы бұйымдарды және медицина техникасын сараптау ұлттық орталығы» РМК-ның www.dari.kz ресми сайты құрылды.
Бұл туралы бүгін Алматыда «Дәрілік құралдардың халық үшін қолжетімділігі мен сапасын арттыру, денсаулық сақтау ұйымдарын медицина техникасымен жабдықтауды жақсартуға қатысты2011-2015 жылдарға арналған «Саламатты Қазақстан» денсаулық сақтауды дамыту мемлекеттік бағдарламасының жүзеге асырылу барысы туралы» тақырыбында өткен баспасөз мәслихатында айтылды.
ҚР ДСМ-ның баспасөз хабарламасында айтылғандай, дәрілік заттардың қауіпсіздігі мен сапасы ұлттық қауіпсіздік мәселелеріне жатқызылды. Осы саладағы қатынастарды реттеудің бірден-бір тетігі мемлекеттік тіркеу болып табылады. Оны өткізу кезінде дәрілік заттарды сараптамадан өткізу міндетті шарт болып табылады.
«Халық денсаулығы және денсаулық сақтау жүйесі туралы» Қазақстан Республикасының Кодексіне сәйкес дәрілік құралдарды сараптауды ҚР Денсаулық сақтау министрлігінің мемлекеттік сараптау ұйымы ғана жүзеге асырады. Дәрілік құралдарды мемлекеттік тіркеу кезінде сараптама жұмыстары жақсы материалдық базасы, мықты кадрлық және ғылыми әлеуеті бар «Дәрілік құралдарды, медициналық мақсаттағы бұйымдарды және медицина техникасын сараптау ұлттық орталығы»арқылы жүргізіледі.
Қауіпсіздігі, тиімділігі және сапасы туралы оң қорытындыдан кейін ғана дәрілік препаратқа медициналық қолданысқа рұқсат беріледі.
Тіркеу құжаттар жинағында берілген дәрілік препарат туралы ақпарат құпия болғандықтан, мұндай ұйымдар дүниежүзінде жабық болып табылады. Жемқорлық әрекеттерді және тапсырыс берушілер тарапынан сарапшыларға қысымды болдырмау мақсатында олардың қатынасына жол берілмейді.
«Дәрілік құралдарды, медициналық мақсаттағы бұйымдарды және медицина техникасын сараптау ұлттық орталығы»кез-келген кезеңде құжаттардың жүрісін және сараптама мерзімін байқап отыруға мүмкіндік беретін Дәрілік құралдарды тіркеу бағдарламасын әзірлеп енгізді. Сараптаманың барлық кезеңдері анық және айқын. Бағдарлама дәрілік құралдар, медициналық мақсаттағы бұйымдар және медицина техникасын сараптау процесін біріздендіруге және автоматтандыруға мүмкіндік береді.
Дәрілік құралдарды, медициналық мақсаттағы бұйымдар және медицина техникасын мемлекеттік тіркеу бойынша қызметтер ұсыну үшін орталықта «бір терезе» қағидаты енгізілген. Ол сараптау процедура кезінде тапсырыс беруші мен сарапшының байланысын болдырмауға мүмкіндік береді. Кіріс құжаттарын қабылдауды және қорытынды құжаттарды беруді мемлекеттік және сараптау органдарының мамандары жүзеге асырады. Олар арнайы бөлінген кабинеттерде отырады.
Жүргізілген жұмыстардың маңызды бағыттарының бірі - алыс шетел, ТМД елдері өндірушілерінің және отандық кәсіпкерлердің сараптама кезеңдері туралы ақпаратқа қол жеткізуін қамтамасыз ету, тіркелген дәрілік заттар, медициналық мақсаттағы бұйымдар және медициналық техника туралы жалпы қолжетімді мәліметтер базасын құру. Сараптама жұмыстарына шарт жасасу кезінде Тапсырыс берушіге сайтқа кіруге мүмкіндік беретін логин және пароль ұсынылады.
Сайтқа сәтті тіркелгеннен кейін Тапсырыс беруші «Сараптау жұмыстары туралы мәліметтер» тарауына кіруге рұқсат алады, онда ол өзінің сұранымдар тізімін, сараптама кезеңдері бойынша ақпаратты, ескертулер және хат алмасу жөніндегі деректерді қарай алады.
Сараптау жұмыстары аяқталғанда Тапсырыс беруші сайттан «Мемлекеттік реестр/Препараттарды іздеу» бөлімінде тіркелген дәрілік заттар, медициналық мақсаттағы бұйымдар және медициналық техника туралы, сонымен қатар «Фармация заңнамасы/Тіркеу бойынша бұйрықтар» бөлімінде ҚР Денсаулық сақтау министрлігі Медициналық және фармацевтикалық бақылау комитетінің тіркеу бойынша бұйрықтары туралы мәліметтерді көре алады.
