«Дем алу мүмкін емес»: Өскемен тұрғындары ауа сапасының күрт нашарлағанына шағымданды
ӨСКЕМЕН. KAZINFORM – Таңертеңнен бері Өскемен қаласының тұрғындары ауа сапасының күрт нашарлап кеткеніне шағымданып жатыр.
Бүгін әлеуметтік желіде қала көшелерінде ауа сапасының нашарлап кетуінен халықтың маска тағып, бет-аузын мойынорағышпен қымтап алып кетіп бара жатқан видеолар тарап кетті.
Мұны әсіресе Назарбаев даңғылында орналасқан Достық үйі мен Гагарин бульвары көшесінің маңындағы тұрғын үйлердің халқы сезген.
«Таңертеңнен дем алу мүмкін емес. Ауада бір қышқылтым дәм сезіледі. Өскеменнің экология мәселесі оңып тұрмағанын бәріміз білеміз ғой. Бірақ бүгін ауа сапасы күрт нашарлап кетті», - дейді Нұрдәулет есімді қала тұрғыны.
Бұған дейін ШҚО төтенше жағдайлар департаменті 20 қараша күні Өскеменде 2 дәрежелі қолайсыз метеорологиялық жағдай қалыптасатынын жария еткен. Бұның да әсері бар болуы мүмкін. Десе де ауа сапасына қатысты нақты бағаны облыстық экология департаменті бере алады. Қазір департамент мамандары оқиға орнына барып, аспаптық өлшеулер жүргізді.
«Гагарин бульвары көшесінде газ анализаторымен азот диоксиді мен формальдегидті өлшеу жұмыстары жүргізілді. Оның нәтижелері шыққан соң бірден хабарланады», - деп хабарлады ШҚО экология департаментінің баспасөз қызметінен.
Айта кетейік, бүгін еліміздің 6 қаласында жайсыз метеорологиялық жағдайлар қалыптасып, ауа ластанатыны хабарланды. Аталған қалалардың ішінде Өскемен де бар.
Сондай-ақ осыған дейін Алматыда экологиялық нормаларды бұзған жүргізушілерге 437 млн айыппұл салынғаны хабарланған.
