Денис Теннің мұз үстіндегі шоуы жалғасын таппақ
«Біздің нақты жоспарымыз бар. Жыл сайын мұз үстіндегі шоуды өткізетін боламыз. Бұл Денистің өзі бастап кеткен жоба. Жанкүйерлеріне қатты ұнайтын. Оксана Алексеевна ( Денис Теннің анасы), Денистің достары - бәрі де жыл сайын келіп, шоуды өткізуге ниет білдірді. Ендігі кезекте шараны қалай өткізуді жоспарлап отырмыз. Міндетті түрде қайта қолға аламыз», - деді «Орталық Азия жанармай-энергетикалық компаниясы» АҚ президенті Сергей Кан Астанада өткен баспасөз мәслихатында.
Еске сала кетсек, «Денис Тен және оның достары» мұз үстіндегі шоуы Астана мен Алматы қалаларында бірнеше рет өтккізілген болатын. Соңғы рет Денис Тен мен оның достары Астанада 9 маусымда «Барыс Аренада» елордалықтарға керемет шоу тарту еткен болатын.
Еске сала кетсек, елордада бүгін өткен Денис Тен қорының баспасөз мәслихатында спортшының анасы Оксана Тен спортшы атындағы мәнерлеп сырғанау академиясын 2019 жылы ашу жоспарланып отырғанын хабарлаған еді.
Өз кезегінде режиссер әрі продюсер Тимур Бекмамбетов Денис Теннің өзі сценарийін жазып кеткен «Көзсіз махаббат» фильмінің түсірілімінің қалай жүргізілгелі жатқанын айтып берген болатын.