Десант биатлоны бойынша сайыс қорытындысы шығарылды
Бірінші орынға Қазақстан Аэроұтқыр әскерлері әскери бөлімдерінің үлгілі парашюттік-десанттық (десанттық-шабуылдау) бөлімшелері таласты. Нәтижесінде 32363 әскери бөлімінің командасы жеңіске жетті.
«Бұл дода Аэроұтқыр әскерлері әскери қызметшілерінің жауынгерлік әзірлігін тағы бір мәрте көрсетті. Барлықтарыңыз оқу және жауынгерлік тапсырмаларды орындауға әзірлікте екендіктеріңізді дәлелдедіңіздер», - деп атап өтті ҚР ҚК ҚӘ Аэроұтқыр әскерлерінің қолбасшысы генерал-майор Дәулет Оспанов.
Десант биатлоны шілденің 20-ы мен 25-і аралығында 35-ші десанттық-шабуылдау бригадасының базасында өткізілді. Алты күндік жарыс ішінде қатысушылар бірқатар сынақтардан өтті: десанттық парашюттерді төсеу, бағдарлау және әскери топография, әскери-медициналық дайындық, АК-74-тен оқ ату, «Атлетизм. Табандылық. Алғырлық» кедергілер жолағы, кәсіби жауынгерлік тапсырма, түнгі рейд пен жүгіру нормативтерін тапсырды.
Сайыс барысын Үндістан Қарулы Күштерінің өкілдері қадағалады. Олар әскери қызметшілеріміздің теориялық және практикалық дайындық деңгейін жоғары бағалады.