Дмитрий Попко Мексикада жарыстың 4-ракеткасын жеңіп, жартылай финалға шықты

АСТАНА. KAZINFORM — Қазақстандық теннисші, әлемнің 275-ракеткасы Дмитрий Попко Морелия (Мексика) челленджер турнирінің жартылай финалына өтті.

Қазақстандық спортшы ширек финалда әлемнің 117-інші, осы жарыстың 4-ракеткасы, аргентиналық Тьяго Агустин Тирантемен бетпе-бет келді.

Бірінші партияда Попко бет қаратпады – 6:1.

Екінші сетте қазақстандық теннисші бірден брейк жасап, 2:0 есебімен алға кетті. Ақыры матчты жеңіспен түйіндеді – 6:4. 

Бір сағат 10 минутқа созылған бәсеке барысында Дмитрий 2 эйспен бірге 5 брейк-пойнттың үшеуін пайдаланды. Тиранте 3 эйспен шектелді.

Дмитрий Попко финалға шығу үшін әлемнің 204-ракеткасы, франциялық Уго Греньемен таласады. Ол рейтингіде 219-сатыдағы аустралиялық Бернард Томичті жолдан тайдырды - 2:6, 7:6 (7:4), 6:2

Тағы бір қазақстандық, рейтингіде 175-сатыдағы Тимофей Скатов Жирона (Испания) челленджер додасының ширек финалында әлемнің 108-ракеткасы, сербиялық Душан Лайовичке 2:6, 4:6 есебімен жол берді. Сөйтіп жартылай финалдан тыс қалды. 

Еске сала кетейік, бұдан бұрын Тимофей Скатовтың Испаниядағы турнирде төртінші кездесуін жеңіспен түйіндегенін жазған едік.

Сондай-ақ Дмитрий Попко Мексикадағы жарыстың ширек финалына жолдама алды.