Дүниежүзілік көшпенділер ойындарына дайындық қалай жүріп жатыр

АСТАНА. KAZINFORM – Астана қаласының әкімі Жеңіс Қасымбек елордада өтетін кезекті Дүниежүзілік көшпенділер ойындарына орай абаттандыру және көгалдандыру жұмыстары туралы айтты.

«Бесінші Дүниежүзілік көшпенділер ойындарына дайындық аясында көктемде жарыс өтетін орындарды абаттандыру және көгалдандыру жұмыстары жүргізіледі. Шілдеде дайын болады деп жоспарлап отырмыз. Сондай-ақ, қоғамдық кеңістіктерді, атап айтқанда, «ЭКСПО» аумағындағы саябақ, Қабанбай батыр даңғылы (Сығанақ көшесінен «Қазанат» ипподромына дейін) және Д. Қонаев пен Достық көшесін ұзартуды жоспарлап отырмыз», - деді Жеңіс Қасымбек Үкімет отырысында. 

Қала әкімінің айтуынша, Астана аумағын көгалдандырудың тұжырымдамасы әзірленді. Ол екі бөліктен тұрады: қоғамдық кеңістіктерді дамыту және көгалдандыру. 

Еске сала кетсек, V Дүниежүзілік көшпенділер ойындары Қазақстанда өтеді. 

Айта кетейік, Астанада 8-14 қыркүйек аралығында өтетін Дүниежүзілік көшпенділер ойындарына 100-ден аса елдің спортшылары қатысады.