ЕАЭО аясында ғылыми дәрежелер автоматты түрде өзара танылады
АСТАНА. KAZINFORM – Бүгін Мәжілістің жалпы отырысында «Еуразиялық экономикалық одаққа мүше мемлекеттерде ғылыми дәрежелер туралы құжаттарды өзара тану туралы келісімді ратификациялау туралы» Заңы қабылданды.
Келісім Еуразиялық экономикалық одаққа мүше мемлекеттер азаматтарының ғылыми дәрежелерін олардың аумағындағы еңбек көші-қоны аясында тануды көздейді.
«Атап айтқанда, ЕАЭО құжатында мүше елдердің ғылыми дәрежелері әр тараптың ұлттық заңнамасына сәйкес танылатыны жазылған. Бұл ретте, жұмыс күшінің бостандығы шектеліп тұрған еді. Сондықтан осы келісім 6-баптағы жағдайды қоспағанда, ғылыми дәрежелер туралы құжаттарды ұлттық тану рәсімдерінен өткізбей-ақ мойындауды ұсынады. Яғни, ЕАЭО-ға мүше елдерде ғалым бір мемлекеттен басқасына барып, келісімшарт негізде уақытша қызмет еткенде, сол кезде оның ғылыми дәрежесі автоматты түрде өзара танылатыны ескерілген», - деді Ғылым және жоғары білім министрі Саясат Нұрбек.
Оның айтуынша, келісімді іске асырудың теріс әлеуметтік-экономикалық және құқықтық салдары жоқ, сондай-ақ мемлекеттік бюджеттен қосымша шығындарды талап етпейді.
