ЕАЭО-ға үйлестірілген монетарлық саясат қажет - ЕАДБ басшысы

АСТАНА. ҚазАқпарат - Еуразиялық экономикалық одаққа үйлестірілген монетарлық саясат қажет. Бұл туралы БЕЛТА Еуразиялық даму банкінің (ЕАДБ) басқарма төрағасы Дмитрий Панкинге сілтеме жасап хабарлады.

Дмитрий Панкиннің сөзіне қарағанда, осы жылы болған оқиғалар өңір елдеріне бұл саладағы үйлесім керектігін көрсетті.

"Биылғы жыл үйлестірілген монетарлық саясат міндетті түрде керек екенін көрсетті деп ойлаймын", - деді ол. Аймақтағы экономикалық жағдайды айта келе ЕАДБ басқарма төрағасы Ресейде құбылмалы бағам саясаты жүргізіліп жатса, Қазақстан немесе Беларусьте валюта бағамын тіркелген режимде сақтап қалу қиын болып отыр.

ЕАДБ - халықаралық қаржы ұйымы. Оны 2006 жылы Қазақстан мен Ресей құрған. Мақсаты - қатысушы елдердің нарықтық экономикасының дамуына, олардық тұрақты экономикалық өсіміне, өзара сауда-экономикалық байланысты кеңейтуге ықпалдасу. Банкке қатысушы мемлекеттер - Армения, Беларусь, Қазақстан, Қырғызстан, Ресей мен Тәджікстан.