Ермұрат Бапи: Аралас сайлау жүйесінің мүмкіндігін дамыта түсуіміз керек
АСТАНА. KAZINFORM – Мәжіліс депутаты Ермұрат Бапи палатаның жалпы отырысында Парламент сайлауының аралас жүйесін дамыта түсуді ұсынды.
– Мен – 25 жылдық оппозициялық қоғамдық қызметтен кейін мемлекеттік биліктің бір өкілетті бұтағына сайлау арқылы келген адаммын. Бұл арадағы негізгі тірек тіркес – сайлау арқылы. Бұдан 20 жыл бұрын жойылған бір мандатты мажоритарлық сайлау және сайлану мүмкіндігі Президент Қасым-Жомарт Тоқаев бастамашылық еткен реформаның арқасында қайтадан қалпына келгені даусыз. Біз бұл сайлау жүйесінің мүмкіндігін дамыта түсуіміз керек, - деді Ермұрат Бапи.
Оның пайымынша, уақыт өткен сайын аталған тәсіл арқылы Мәжілістен орын алған депутаттардың ықпалы артып келеді.
- Қазақстан Парламентінің Мәжілісінде мажоритарлық мандатпен келген депутаттардың бір шоғыры пайда болды. Қоғам мен мемлекеттік билік арасында дәнекер көпір салуға әрекет қылып жүрген бұл депутаттардың дәрменсіз даусы барған сайын батыл шыға бастағанын құлағында саяси мүкістігі жоқ қауым естіп отырғаны айдан анық, - деді депутат.
Айта кетейік, бүгінгі Мәжіліс жиынында Президент Қасым-Жомарт Тоқаевтың саяси реформасы талқыланып жатыр. Оған палата депутаттарынан бөлек, ғалымдар мен сарапшылар, БАҚ басшылары қатысып отыр.
