Екібастұзда бұрынғы мектеп директоры 7 жылға сотталды
Бұл туралы Павлодар облысы бойынша экономикалық қылмысқа және сыбайлас жемқорлыққа қарсы күрес департаментінің баспасөз қызметінен хабарлады.
Олар сонымен бірге, мемлекеттік қызметте және жергілікті өзін-өзі басқару органдарында лауазымдық қызмет атқару құқықтарынан 3-4 жылға айрылды. Мектептің директоры, бас есепшімен және шаруашылық істері жөніндегі орынбасарымен қосылып, ресми құжаттарға жалған мәліметтер енгізу жолымен, 3,2 миллионнан астам теңгені қалталарына басқан. Табельдерге мектепте техникалық жұмысшы ретінде жұмыс істейді деп біраз адамды тіркеп қойған олар, жалақыларды өздері алып отырған.
Жалақы қорындағы артық ақша да қаржы полицейлерінің назарына ілігіп отыр. 2006-2008 жылдар аралығында жинақ ведомость құжатына жалған мәліметтер енгізіліп келіп, нәтижесінде директорға - 1,5 миллион теңге, оның орынбасары мен есепшіге - 992 мың және 37 мың теңге аударылған. Директор мен оның орынбасарының сондай-ақ, спорттық залды заңсыз жалға беріп, одан түскен 110 мың теңге ақшаны қалталарына басқаны анықталды.