Экология министрлігіне қарасты 8 қызметкер жемқорлық бойынша сотталды – Антикор

АСТАНА. KAZINFORM – Сыбайлас жемқорлыққа қарсы іс-қимыл агенттігі Kazinform сауалына жолдаған жауапта Экология және табиғи ресурстар министрлігінің қызметкерлері арасындағы сыбайлас жемқорлық көрсеткіштері туралы мәлімет берді.

Еске салсақ, «Бөкейорда» мемлекеттік табиғи резерватының бас директоры жемқорлық бойынша күдікке ілінгені мәлім болған. 

Осыған орай Сыбайлас жемқорлыққа қарсы іс-қимыл агенттігінен Экология және табиғи ресурстар министрлігі қызметкерлерінің арасындағы жемқорлық көрсеткіші туралы мәлімет сұраттық.

- Агенттік 2024 жылы министрліктің және оның аумақтық бөлімшелерінің қызметшілеріне қатысты 15 сыбайлас жемқорлық қылмысты тіркеді. Оларды жасауда 9 адам әшкереленді, оның ішінде 8 адам сотталды. Аяқталған қылмыстық істер бойынша белгіленген залал - 167,3 млн теңге, оның 45 млн теңгесі өтелді, - деп жазылған жауапта.

Агенттік 2024 жылы жемқорлықтың алдын алу мақсатымен «Ертіс Орманы» және «Семей орманы» табиғи резерваттарындағы сыбайлас жемқорлық тәуекелдеріне сыртқы талдау жүргізген.

- Талдау нәтижелері бойынша министрлікпен бірлесіп, орман және табиғи ресурстарды басқаруда анықталған жүйелік сыбайлас жемқорлық тәуекелдерін жоюға бағытталған Жол картасы әзірленіп, бекітілді. Сондай-ақ, биылғы 21 сәуірде Агенттік алаңында экология саласындағы сыбайлас жемқорлық тәуекелдерін жою мәселелері бойынша ведомствоаралық кеңес өтіп, орман шаруашылығы мен табиғи резерваттарда анықталған жүйелік мәселелер мен сыбайлас жемқорлық тәуекелдеріне ерекше назар аударылды. Нәтижесінде, министрлікке және оның құрылымдық бөлімшелерінде сыбайлас жемқорлық тәуекелдеріне ішкі талдау жүргізу бойынша ұсыныстар берілді, - деп жазады Антикор мамандары.