«ЭКСПО-2017» «FourЭ» фестивалінде 3d-mapping шоуын тарту етті
АСТАНА. ҚазАқпарат - «Астана ЭКСПО-2017» халықаралық көрмесі сенбі күні өткен Алматыда «FourЭ» эко-этнофестивалінің қонақтарына «Менің болашақ энергиям» ауқымды жарық шашу шоуын ұсынды, деп хабарлады көрменің баспасөз қызметінен.
Шоу заманауи балет пен проекциялық жазықтықта кез келген суретті бейнелеу арқылы таң қаларлық визуалды иллюзияны көрсететін 3D-mapping технологиясын қамтыды.
«ЭКСПО-2017» ұйымдастырған шоудың негізгі идеясы - әр адамның ішкі энергиясының пайда болуын көрсету. Фестивальде 4 тақырып - «Энергия әлемі», «Өмірге қажетті энергия», «Жалпыға қажетті энергия» және «Менің болашақ энергиям» ашылды.
Атап өту керек, Астанада ЭКСПО көрмесінің аумағында 2017 жылы 3 мыңнан астам мәдени шара мен шоулар өтеді. Олар да «FourЭ» фестиваліндегідей инновациялық сипатта болмақ.
«FourЭ» эко-этнофестивалі екінші жыл қатарынан «Астана ЭКСПО-2017» халықаралық мамандандырылған көрмесінің қолдауымен өтуде. Үш күннің ішінде отандық және шетелдік музыкалық және би ұжымдары өнер көрсетті, заманауи өнер мен дәстүрлі қолөнер көрмелері, йога, фитнес және би бойынша 100-ден астам шеберлік сағаттары өтті.
