ЕҚЫҰ Саммитіне арналған марка қолданысқа енгізілді
АСТАНА. 23 қараша. ҚазАқпарат /Қанат Мәметқазыұлы/ - Бүгін Астанада 1-2 желтоқсанда өтетін ЕҚЫҰ Саммитіне арналған үш көркемсуретті маркадан тұратын почталық блоктар айналысқа енді.
Осыған орай, Сыртқы істер министрлігінде ведомствоның Халықаралық ақпарат комитетінің төрағасы Роман Василенко мен «Қазпошта» АҚ-ның басқарушы директоры Андрей Вагнердің қатысуымен аталған маркаларды қолданысқа ендірудің салтанатты шарасы болып, пошталық блокты арнайы мөртабанмен басу рәсімі өтті.
«ЕҚЫҰ саммитіне арналған марканы арнайы қолданысқа енгізу - бұл пошталық жөнелтілімді қарапайым белгілеу ишараты емес. Аталған бірегей үдерістің ауқымды тарихи құндылығы да баршылық. Біздің еліміз үшін үлкен саяси мәнге ие бұл жағдай тарихтар қойнауында мәңгіге есте қалатын оқиға болып отыр. Сондықтан да, арнайы пошталық мөртабанмен қолданысқа енгізілген марка әлем елдерінің филателистерінің коллекциясында құрметті орынға лайық», деді салтанатты шара барысында «Қазпошта» АҚ-ның басқарушы директоры Андрей Вагнер.
Номиналы 190, 140, 32 теңге маркалардың көлемі 28 және 40 мм, ол офсеттік әдіспен төрт бояумен басылған. Маркалардың таралымы - 90 мың дана. Үш көркемсуретті маркадан тұратын пошталық блокта Қазақстан Туы аясында Президенттің Ақорда резиденциясы, Тәуелсіздік сарайы, Бейбітшілік пен келісім сарайы, «Қазақ елі» монументі бейнеленген. Жаңа пошталық маркаларды «Беларус баспасөз үйі» баспасы шығарған, оларды пошта жөнелтуге кез келген адам пайдалана алады.
