Елбасы кезекті рет Қарағандыдағы тоқтап қалған ауылшаруашылық ұшақтарын шығару жобасы мәселесін көтерді
ҚАРАҒАНДЫ. ҚазАқпарат - ҚР Президенті Нұрсұлтан Назарбаев кезекті рет Қарағандыдағы тоқтап қалған
ауылшаруашылық ұшақтарын шығару жобасы мәселесін көтерді. «Қолға алынған жобалар әлі де жұмыс жасамай тұр. Бұлар - «ҚазАвиаСпектр» зауыты мен Пархоменконың машина шығару зауыты. Олар неге тоқтап тұр?». Елбасы өзінің жұмыс сапары барысындағы облыстың әлеуметтік-экономикалық дамуы жөніндегі жиыны кезінде өңір басшысына осындай сауал қойды.
Қарағанды облысы әкімінің орынбасары Ануар Ахметжанов Мемлекет басшысын бұл жобалар жөніндегі жұмыс қолға алынады деп сендірді.
«ҚазАвиаСпектр» - барлық қажетті жұмысты жасады. Биыл Сіздің тапсырмаңыз бойынша ресейлік әріптестермен олардың келісім бойынша атқаруға тиіс міндеттері жөнінде жұмыстар жүргізілді. Өкінішке қарай, қанша тырысқанымызбен олар өз тарапынан ынта танытпады», - деп хабарлады ол.
Әкім орынбасарының айтуынша, «ҚазАвиаСпектр» алғашқы ұшағын биылғы қазанда шығаруды жоспарлап отыр.
Өз кезегінде Елбасы: «Елге көрсетіп, бір рет ұшырдыңдар, осымен іс бітті ме?» деп сынға алды.
Президент Шахтинскідегі осымен 6 жыл бойы тоқтап тұрған жуғыш заттар зауытының тағдырына да қызығушылық танытты. «Сарандағы РТӨ зауыты 30 пайыз ғана қуатпен жұмыс жасауда. Яғни, сендерге оның қуатын көтеру керек», - деп қосты Елбасы.
Сондай-ақ, Н. Назарбаев индустрияландыру бағдарламасын жүзеге асыру - барлық облыс, қала және аудан әкімдерінің алдындағы зор міндет екендігін атап өтті.
