Елбасы Ұлттық Банк төрағасына зейнетақы жүйесін одан әрі реформалау жөнінде ұсыныстар әзірлеуді тапсырды
АСТАНА. 17 қыркүйек. ҚазАқпарат - Бүгін Мемлекет басшысы Нұрсұлтан Назарбаев Қазақстан Республикасы Ұлттық Банкінің төрағасы Григорий Марченконы қабылдады, деп хабарлайды ҚР Президентінің баспасөз қызметі.
Кездесу барысында Г.Марченко Қазақстан Президентіне еліміздің қаржы саласындағы, атап айтқанда, банктік сектор мен валюта нарығындағы жағдай туралы баяндады.
- Валюта нарығындағы және банктік сектордағы жағдай тұрақты күйінде қалып отыр. Бізде Ұлттық кор мен алтынвалюта активтерінің өсуі жалғасуда. Бүгінде олардың жиынтық көлемі 85 миллиард долларды құрайды. Еліміздегі инфляция деңгейі айтарлықтай жоғары емес және 4,7 пайызды құрайды, - деп атап өтті Ұлттық Банк төрағасы.
Мемлекет басшысы кездесудің қорытындысы бойынша зейнетақы жүйесін одан әрі реформалау және мемлекеттік-жеке меншік серіктестік аясында іске асырылатын жобаларды қаржыландыру кезінде қаржы институттарының қаражатын пайдалану жөнінде ұсыныстар әзірлеуді тапсырды.
