Елбасы Жолдауын ел арасында насихаттауға әділет саласы қызметкерлері де белсене араласуда

ОРАЛ. Ақпанның 16-сы. ҚазАқпарат /Елжан Ералы/ - Елбасы Жолдауын ел арасында насихаттауға әділет саласы қызметкерлері де белсене араласуда. Бұл туралы БҚО әділет департаменті бастығының орынбасары Күнсәуле Аралбекова мәлім етті,

деп хабарлайды ҚазАқпарат тілшісі.

Оның айтуынша, Елбасы құқықтық сала қызметкерлерінің алдына да үлкен міндеттер қойғаны мәлім. Өңірде осы бағытта тақырыптық дәрістер оқылып, семинарлар ұйымдастырылуда. Айталық, облыс орталығында жұмыс жасайтын «Заң және біз», «Жасөспірім және заң» кинодәрістеріне әділет басқармасының қызметкерлері үнемі қатысып, әдістемелік көмек көрсетуде. Сол секілді Шыңғырлау, Бөрлі, Қаратөбе, Зеленов, Бөкей ордасы аудандарында Елбасы Жолдауы мен ҚР қолданыстағы заңдарын түсіндіру мақсатында семинар, тұрғындармен кездесулер ұйымдастырылды.

Мұндай шаралар алдағы уақытта да жалғасын таппақ.