Елбасының сыйлығы баламның болашағының бағдары болмақ - Нәзира Өскенбаева
Мұндай сыйлық баламыздың болашағының айқын бағдары болмақ, - деді 1 «Е» сыныбының оқушысы Омархан Балжанның анасы Нәзира Өскенбаева.
«Бүгін баламыздың өмірінде ерекше қуанышты күн. Тек 1-сынып табалдырығын аттап қана қоймай, Елбасынан арнайы сыйлық алып жатыр. Бұл сыйлық біздің балаларымыздың болашағының айқын бағдары болмақ. Баламыз Отаны туралы көп мағлұмат біліп, өз еліне деген сүйіспеншілігі артады. Менің Елбасына алғысым шексіз. Әр 1-сынып оқушысын елеп-ескеріп, қуантып жатқаны үшін», - деді Нәзира Өскенбаева.
Айта кетейік, жаңа кітап 370 мың данамен таралған.
«Қымбатты жас дос! Сен жаңа белеске қадам бастың - мектепке келдің, оқушы болдың!
Бұл сен үшін үлкен мереке. Ал мерекеде сыйлық беріледі. Бұл кітап - менің саған жасаған сыйлығым!
Мектепте сені қызықты жаңалықтар мен ғажайып уақиғалар күтіп отыр.
Қазақстан - біздің Отанымыз. Өз Отаныңның тарихы мен мәдениетін, ана тіліңді білуің керек. Бұған алғашқы ұстазың мен оқулықтарың, осы кітабың көмектеседі.
Қазақстанның болашағы жарқын. Елімізде татулық, береке болады. Бұған достарыңмен бірге сен де өз үлесіңді қосасың. Білім әлеміне саяхатың сәтті болсын!» - делінген Мемлекет басшысының білім шаңырағының есігін ашқалы отырған оқушыларға жолдауында.
Аса көркем суреттермен безендірілген кітапта Қазақстан Республикасының мемлекеттік рәміздері, «Мәңгілік ел» ұлттық бағдарламасы жөнінде айтылады. Мектеп есігін ашқалы отырған балдырғандарға Қазақстаннның картасы, елордамыз - Астана, Алматы қаласы және әр аймақ туралы жеке беттер ұсынылып отыр.
Сондай-ақ, шығармадан бірінші сынып оқушылары Қазақстанның табиғаты мен климаты, біздің республикамыздың әсем өңірлері жайлы жан-жақты білетін болады.
Қазақстанның мақтанышы - Байқоңыр кешеніне арнайы бет берілген.
Бөлек бөлім Қазақ хандығының 550 жылдығына және қазақ халқының ағартушыларына арналып отыр.
Еске сала кетсек, ҚР Білім және ғылым министрлігінің ақпаратынша, 1 қыркүйекте 336 мың бірінші сынып оқушылары мектеп партасына отырады.