Елді мекендерге қауіп жоқ: Министрлік Баянауылдағы дала өртіне қатысты мәлімдеме жасады

ПАВЛОДАР. KAZINFORM - ҚР Төтенше жағдайлар министрлігі қабылданған шаралардың нәтижесінде Баянауылдағы өрт алдын ала 60 гектар алаңда оқшауланғанын хабарлады. Бұған қоса тілсіз жаудың елді мекендерге қауіп төндірмейтінін мәлімдеді.

Министрліктің Командалық орталығында Төтенше жағдайлар вице-министрі Рамиль Камаловтың басшылығымен өртті сөндіру жөніндегі жедел штаб өз жұмысын жалғастырып жатыр.

- Өртті сөндіруге Төтенше жағдайлар департаментінің, орман шаруашылығының, Қазавиаорманкүзеті мен орманшылықтың күштері және құралдары дереу жіберілген. Барлығы 85 адам және 24-тен астам бірлік техника жұмылдырылды. Қатты жел мен құрғақ өсімдіктер өрттің тез таралуына ықпал етіп, жедел жұмысты қиындатты. Осыған қарамастан құтқарушылар өрттің елді мекендерге таралуына жол бермей, сөндіру жұмыстарын жалғастырып жатыр. Тұрғындар үшін қауіп жоқ. Қабылданған шаралардың нәтижесінде өрт алдын ала 60 гектар алаңда оқшауланды, - деп мәлімдеді министрліктен.

Ал Баянауыл ауданы әкімдігінің ақпарынша, дала өртін сөндіруге 200-ге жуық адам жұмылдырылған.

- Тілсіз жаумен күресуге Торайғыр, Бірлік, Аймауытов ауылдарының, Баянауыл мемлекеттік ұлттық табиғи паркінің, төтенше жағдайлар бөлімінің техникалары мен қызметкерлері дереу шықты. Сондай-ақ облыстық Төтенше жағдайлар департаментінен қосымша техникалар көмекке келді. Апат алаңында жеке тұлғалардың көліктері де өртті ауыздықтау үшін қызметте. Қатты желдің әсерінен қиындықтар туындағанымен, қазіргі уақытта көптің күшімен өрт бәсеңдеді. Жақын маңдағы ауылдардан өртті сөндіруге келіп жатқан адам күші мен техникалар әлі де толастаған жоқ, - деп хабарлады аудан әкімдігінен.

Жергілікті тұрғындар түсірген бейнежазбаларда қалың өрттен Жасыбай орманшылығындағы ғимараттардың өртеніп жатқанын көруге болады. Баянауыл ауданының әкімдігі әзірше бұл ғимараттардың кімге тиесілі екенін айта алмады.

Еске сала кетейік, Баянауылда ұлттық паркке қарасты жерлер өртеніп жатыр.