Елена Рыбакина Майами турнирінде жарыс жолынан шығып қалды

АСТАНА. KAZINFORM — Қазақстанның бірінші, әлемнің 8-ракеткасы Елена Рыбакина Майами (АҚШ) WTA 1000 турнирінің үшінші айналымына өте алмады.

Қазақстандық теннисші тартысты матчта әлемнің 40-ракеткасы, 20 жастағы Эшлин Крюгерге жол берді — 4:6, 6:2, 4:6.

Бір сағат 52 минутқа созылған бәсеке барысында Рыбакина 5 эйспен бірге 4 брейк-пойнттың екеуін пайдаланды. Крюгер 4 эйс, 2 брейкпен (3 брейк-пойнт) көзге түсті.

Бұған дейін Е.Рыбакина екі жыл қатарынан Майами турнирінің финалына шыққан еді. Биыл сол нәтижесін қайталай алмай, рейтингілік ұпайынан айырылды.

Оның сәуір айында Штутгарт (Германия) WTA 500 додасына қатыспайтынын ескерсек, үздік ондықтан шығып қалу қаупі төніп тұр.

Еске сала кетейік, бұдан бұрын Рыбакинаның Қазақстан намысын қорғау үшін өзі чемпион болған жарысқа қатыспайтынын жазған едік.