Елімізде 2009 жылғы шілденің 1-нен бастап дәрілік заттарды бірыңғай дистрибьютор арқылы бөлудің жаңа жүйесі енгізілетін болады - Ж. Досқалиев

АСТАНА. Қаңтардың 30-ы. ҚазАқпарат /Ернұр Ақанбай/ - Елімізде 2009 жылғы шілденің 1-нен бастап дәрілік заттарды бірыңғай дистрибьютор арқылы бөлудің жаңа жүйесі енгізілетін болады. Бұл туралы Денсаулық сақтау министрлігінің бүгінгі алқа мәжілісінде министр Жақсылық Досқалиев айтты,

деп хабарлайды ҚазАқпарат. Оның сөзіне қарағанда, бұл шара дәрі-дәрмектердің сапасы мен қауіпсіздігін қамтамасыз етуге, оларға қол жетімділігін арттыруға, отандық фармацевтикалық өнеркәсіпті дамытуға, дәрілік препараттардың сатып алынатын бағасын төмендетуге, сондай-ақ дәрі-дәрмектермен қамтамасыз етуді жоспарлаудың тиімділігін ұлғайтуға мүмкіндік береді. Ж. Досқалиевтің сөзіне қарағанда, осы жүйе енгізілгеннен кейін дәрі-дәрмектерді сапасына қарай сұрыптау қатаңдайды, дәрілік құралдардың барлық тобы мемлекеттік сарапшылық зертханаларда міндетті түрде сертификацияланады, халықаралық стандарттарға сәйкес, дәрі-дәрмектерді сақтау шарттары сақталады. Бұдан бөлек енгізілетін жүйе бойынша бірыңғай дистрибьютордың қоймаларында дәрі-дәрмектердің үш айға жететін қоры сақталады және олар еліміздің әр түпкіріндегі тапсырыс берушілерге үздіксіз жеткізілетін болады. Сондай-ақ жүйеге сәйкес, отандық өндірушілерге преференциялар ұсынылып, олармен ұзақмерзімді келісім-шарттар жасалады. Делдалдардың қызметіне тосқауыл қойылады. Сонымен қатар, Денсаулық сақтау министрлігі бірыңғай дистрибьютордың ақпараттық жүйесі арқылы ауруханалардағы дәрі-дәрмектердің айналымына мониторинг жасап отырады.